【网议政事】捉鬼变鬼打鬼 和勇割席互插

Mary

　　

　　勇：「天屍」累小队退场 和：谋带风气情绪勒索

　　泛暴派过去7个月成日话唔割席，对「勇武暴徒」嘅行为只眼开只眼闭，又要成日呃自己啲行为系警方卧底所为，于是又精神分裂地「捉鬼」，结果捉到啲「勇武暴徒」心灰意冷、不同「小队」损兵折将，近日纷纷宣布因为「黄丝」嘅捉鬼行动而退出黑暴运动。呢件事喺网上引起两极反应，「勇武派」闹爆嗰班「和理非捉鬼天屍」累死手足，「和理非」就闹佢哋喺度带风向打击士气，仲话冇人想知佢哋系咪要退出，呢啲咪真系「黄丝」所讲嘅「将义士当Condom」罗。

　　继之前针对警察嘅所谓「屠龙小队」被爆出因为捉鬼几近灭团，陆续被警方拘捕後，近日又有多个「勇武小队」先後宣布要退出黑暴运动、暂停行动，或者解散，包括「仇士小队」、「反狗特勤队」同「火炬小队」等。

　　闹班冷气军师捉鬼唔使本

　　其中，「仇士小队」话以前佢哋「行动」时都有人开遮帮佢哋掩护，但到旧年11月就有好多成员被捕；「特勤队」就话佢哋精于「装修」、袭警、抢犯等，但成日因为发型俾人当系警察，啲所谓「手足」又唔肯听前线「勇武」嘅指挥等，直言啲捉鬼行动令佢哋好大压力；「火炬小队」亦话佢哋「戴耳机，主动火魔，主动装修等，都被人指控做鬼」，决定解散。