搬法律威胁「手足」 数十TG频道休台谴责

Mary

　　

　　「Lunch仔」对「手足」一言不合就分化，搞到班「同路人」极度唔妥佢，声言「Lunch仔」快被「手足」围殴，而「Lunch仔」就搬出法律条文威胁，令更多「同路人」不满，几十个Telegram（TG）频道今个星期休台一周以示谴责。而「Lunch仔」就死撑，质问班人系咪要「10.1出去班『手足』睇唔到哨台，一镬熟比（俾）你拉晒（晒）」，双方互咬到一地狗血同花生。

　　「Lunch仔」喺黑暴期间博出名成功後，俾「同路人」揭发诸多「罪状」，包括佢为呃光环，喺法庭送车时嗌口号、挡囚车去路，令警方因此拉橙带阻隔群众同囚车，搞到还柙嘅「工程巴」家人冇办法送车道别。有人揭发「Lunch仔」打压言论自由，见有人喺TG群组发文批评，「Lunch仔」就会用管理员身份移除异见，俾「同路人」闹爆佢「打压异己」、「行假民主」。

　　闹「手足」「收咗钱」 叫人嘘佢走

　　呢啲不满逐渐发酵，日前喺沙田新城市广场「和你Lunch」期间，「Lunch仔」就俾黑衣「同路人」兜口兜面质问对唔对得住「手足」、拎够「光环」未。不过，佢就反闹呢个「手足」「收咗钱」，仲叫人嘘佢走。佢事後又喺Instagram再炒作事件，话「精神d（啲），临时演员都系演员，你啲戏好唔掂啊」、「最後系（喺）度多谢沙田帮我嘘走佢」，引来「文宣」频道不满，声言「睇嚟『手足』集体围殴你嘅日子越来越近」。

　　「Lunch仔」就未惊过，发文反击「系就快」，又引《侵害人身罪条例》第十七条，话以任何方式非法及恶意伤害任何人或导致任何人身体受严重伤害，即属犯可循公诉程序审讯的罪行，可处终身监禁。