游蕙禎鬼话连篇不顾回水引网友咒駡

成舍我

青年新政游蕙禎近日喺社交网站facebook（fb）好活跃，日前又上载短片到fb回顾二○一六年，佢喺片段中翻旧帐，狂数政府过去一年治港不善，批评政府损害香港既有嘅秩序和规矩，搞到香港个个都人人自危，但对自己喺旧年十月中因宣誓辱华而引发嘅轩然大波、之后又衝击立法会整伤六个保安，及佢同梁颂恆被法庭取消立法会议员资格，以及拖欠立法会嘅营运开支唔回水等事件全部只字不提，究竟佢係失忆定忘我呢？

播独瘫立会 撤职未回水

继早前首次喺fb玩Live讲歷史，之后又大跳日本爆红嘅恋舞，喺踏入新嘅一年，佢又上载咗一段长约四分钟嘅「2016回顾」。短片所见，佢喺黑房入面多次分身面对镜头自白，但內容就无乜新意，句句都只係闹爆政府，由旧年农历新年嘅旺角暴乱有警察向天连开两枪，到教育局局长吴克俭（吴得掂）將大学生自杀归咎佢哋无做好「人生规划」，以至近期未经諮询就拍板兴建嘅香港故宫文化博物馆，喺片尾都不忘批评现届政府带头破坏香港既有秩序同规则，玩弄法律、剥削同迫害人民，仲话佢哋係「黑社会」唔应该被称为政府。但翻查资料，吴得掂当时讲嘅係「生涯规划」而唔係「人生规划」，难怪畀网友闹佢「脱离现实言词夸大」啦！

愈听愈觉得唔妥，旧年九月自游梁当选开始，立法会就立立乱，先係佢哋宣誓时以「支那」字眼辱华及疑似爆粗，之后又访台同台独分子一齐「播独」，跟住又多次衝击会议厅企图强行宣誓、瘫痪立法会，最后搞到全国人大常委会要出手释法，跟住两人被法庭裁定取消议员资格，仲有立法会嘅营运开支一百八十六万元过期唔还，呢啲全部都係因两人而起，但要回顾二○一六都对事件只字不提，根本就无反省过自己到底错喺边！究竟佢係失忆、忘我抑或諗住唔提就唔存在，当冇发生过呀？

网民斥大言不惭 鬼话连篇

除咗部分支持者嘅美言外，惹嚟网民嘅批评就更多。唔少网民留言指佢大言不惭，有网民甚至批评佢「欺骗无知群众去盲目误信天马行空」，又话佢只係不停重复为人所知嘅问题。亦有网民指佢鬼话连篇、危言耸听、口水多过浪花，建议游蕙禎「计一计差政府几多钱，好快啲回水啦」。

「青山新症」（「青年新政」）原本话要「众筹」500万元打官司，点知游蕙禎喺元旦游行话调低目标价到160万元，大家諗住佢哋筹旗变酬宾、三二折都照杀时，原来呢个先係Mission Impossible（不可能的任务）。「青症」前晚深夜喺facebook出post（帖文），为「众筹」定出期限：1月9日下星期一。以佢哋之前用咗个几月先筹得51万元嘅战绩，睇怕都无乜可能做到。

「青症」话之前筹到嗰51万元「已悉数支付作律师费」，而由于预计终审法院会喺本月上旬处理上诉许可，因此必须喺本月9日限期前筹得终院开庭按金160万元，叫港人「聚沙成塔」小额捐款，更加制图列出跑数目标（上图）：每人捐100元就要16,000人、捐200元就要8,000人、捐500元就要3,200人。佢哋声称「明白上诉成本甚鉅，一旦败诉，处境堪忧」，但放弃上诉「方为不负责任之举」云云。

想几日筹百几万元，好多网民都觉得无乜可能，「李广仙」更加突破盲肠：「话时话嘞，筹唔够160万（元），上唔到诉，收钱以『青年新症』名义，就算你两条友破产，都唔使交出嚟，但係你哋就有权，动用捐款，最后笔钱咪落咗你哋个袋囉，两只呃钱怪，又白痴唔晒喎，一定有高人教路啦。」

根据东方日报、文汇报等综合采编

【文章观点仅代表个人观点】