林郑终「放下包袱」星期五fb开Live倾《施政报告》

Mary

　

　　香港特首林郑玩Facebook都叫做有差唔多1年半经验，不过Jenny印象中，林郑仲有一个Facebook功能系未用过嘅，就系开Live喇！

　　星期五8点约定你！

　　你知啦！事先拍条片再摆上网，同开Live直播立即回应大家嘅问题，点都有分别嘅！今日林郑就听到大家嘅「愿望」，同大家讲，今个星期五（17日）夜晚8点会做个Facebook Live，话希望亲自听吓大家对今年《施政报告》嘅意见喎！

　　其实林郑喺参选时先学玩Facebook，虽然比其他人慢，但都叫肯踏出第一步，佢啱啱开咗专页冇耐嗰阵，仲话好愿意用Facebook Live同市民直接沟通添！而当佢第一份《施政报告》出炉时，都有讲过话想开Facebook Live嚟回应市民问题。

　　睇唔到Live都可事先留言

　　Jenny都觉得呢个做法就最能体现林郑成日挂喺口边嘅「新思维」喇！本来满心期待，可惜林郑之後就话，嗰阵时有同事对开Live「有保留」，所以最後都系冇搞到。不过，以Jenny了解嘅林郑，想做嘅事就一定会搵办法去做到，今年佢「卷土重来」，唔知系因为嗰位同事已经准备好、定系已经搵到准备好嘅同事呢？

　　Anyway，林郑仲同大家讲，如果嗰晚唔得闲都唔紧要，可以「预先喺呢个Post度留言，当晚除咗即场交流，我都会抽部分留言出嚟回应！」照顾埋唔得闲睇Live嘅市民！所以大家如果有嘢想讲、有嘢想问，就快啲去留言啦，Jenny估林郑见到大家「炸爆」自己个Facebook，一定会好开心市民反应咁热烈！

　　【华发网根据大公报采编】