【网议政事】「612」筹过亿 竟叫「手足」申法援

Mary

　　

　　大台呻穷话律师费贵唔够分 被质疑「法律支援」藉机发财

　　大台成日叫人捐钱就咩法宝都尽出，啱啱嗰个星期日筹款时仲播埋《愿荣光归香港》呢啲「港独」歌，但要使钱落所谓「义士」度时，就开始斤斤计较。日前，有「女义士」踢爆「612人道支援基金」唔人道，唔肯批钱畀佢请律师，令到佢要弃用原本律师团队，改用法援素未谋面嘅律师。可能俾人闹得太犀利，「612」前晚跳出嚟同大家「计数」，话如果个个都要用自己嘅首选律师，基金好快乾塘，所以大家要先申请法援。有网民反问，点解前线「手足」无偿付出，但啲「义务律师」唔收顺啲。喂阿哥，佢哋唔赚被告钱赚边个钱啫！

　　筹完9,000几万做「人道支援」，但结果叫人「申请法援」，唔「关公」灾难就奇。「612」前日再喺facebook解画，话有成500几人被告暴动，如果每人要180万去打官司，支援大概30人就会乾塘，所以如果大家唔想筹够9亿嘅话，「手足」一定要先申请法援（下图）。

　　至于「612」嘅角色， 就系喺「裁判法院阶段」最多每日资助1.2万畀啲被告请律师，喺区域法院、高院或上诉时去为成功申请法援者提供「法援分担费」，或者帮申请唔到法援嘅人畀返法援水平嘅律师费用咁话。

　　打官司开价180万都算「义务」？

　　啲黄丝热情捐款，都冇谂过「612」又要拣case、又要畀「最低工资」人?嘛，于是网上又骂声一片。「热狗」副主席郑锦满就留言质问：「『前线手足』无偿付出自由，律师反而要收足费用？唔系『义务律师』吗？」「热狗」马启聪亦质问班黄色律师点解好意思收人一个case 180万，「你如果系谂住当正做生意嘅话，你早啲讲明吖嘛，扮乜嘢『人道支援』啫。」

　　原名叶键濠嘅商业电台节目主持健吾又谂唔明点解大台永远悭「义士」，唔去悭律师，「『义士』系免费，法律专业就要收钱。呢点我系谂唔通嘅。」