【网议政事】泛暴候任区员 网煽黑暴乱港

Mary

　　

　　公然打卡揭撑暴真面目 刻意鼓动仇警毁平安夜

　　前晚原本系喜迎圣诞嘅平安夜，但因为一班黑衣魔又出嚟搞搞震，入侵各大商场，滋扰同破坏店舖，更攻击便装警员制造混乱，吓走行紧街嘅市民，令到呢个平安夜一啲都唔平安。不过，一班一向声称关心民生、成功上位嘅泛暴派候任区议员，就纷纷喺facebook暴露咗?哋有份煽动暴徒上街参与暴力行为，竭尽所能搞乱香港，连大部分市民想要嘅一个平平安安嘅平安夜都唔放过。

　　「光复东涌」发起人、东涌南区候任区议员王进洋就喺facebook明目张胆上传咗一张自己喺暴乱现场戴口罩嘅相，仲附文声称「平安夜，要平安，庆祝同失身嘅机会大把，不过『手足』嘅公道，唔系咁多机会帮佢还......留待『光复』过后，你慢慢玩个够」云云，再有标签写住「出黎（嚟）食宵夜喇喂」，公然煽人上街。

　　王进洋刘家衡自爆上前线

　　公民党南昌北候任区议员刘家衡亦都打卡话自己喺暴乱现场，假惺惺话「不平安的平安夜，请在外的各位小心」云云，如果真系关心人哋嘅安全，唔系应该叫佢哋远离暴力咩？

　　「热血公民」、候任大埔区运头塘区议员黄兆健，前晚就转发「热血公民」立法会议员郑松泰喺8月份个post（帖子），内容系一张电话联络方法图片，写有「法律及被捕支持」、「热血安全车队」同「热血义诊」，声称「组织了一队安全车队，接送街坊平安回家」云云，好似系要话畀暴徒听，佢哋有后台支持放心搞破坏咁话。

　　候任中西区区议员梁晃维，噚日午夜12点23分话自己「视察兰桂坊」，实际就系为暴徒站岗放哨，报告防暴警察位置，方便暴徒趁虚而入。

　　梁晃维「睇水」 林廷衞煽仇

　　民主党元朗东头候任区议员林廷衞，则声言「比（畀）人过一个平安既（嘅）平安夜系唔得既（嘅），如需协助可直接打比（畀）我。」又标签咗一句「说好的不派防暴呢？」不过，翻查警方记者会，由头至尾都未讲过唔派防暴警察，林廷衞故意倒果为因，无非系企图挑拨警民矛盾，甚至要将平安夜唔平安嘅责任推诿给警察。

　　所谓「独立民主派」、葵青区议员周伟雄，前晚7点就上传咗一张圣诞图，但内容就唔系圣诞祝福，而系煽动人上街，佢就附文话「今个圣诞未必快乐，期待明年煲底同庆」、「光复香港、时代革命」、「五大诉求、缺一不可」云云，又倒果为因扬言「请即停止『滥暴』拘捕市民」云云，刻意煽动市民仇警情绪，为暴力添火加油。

　　周伟雄屈警 张秀贤庇魔

　　前「学民思潮」发言人、元朗候任区议员张秀贤，又发布元朗警署消息，指「绝大部分被捕者见晒律师同落左（咗）口供，家属同律师都已经喺警署离开，朝早会再跟进。」好似要话畀大家知搞完事就可以冇嘢咁话，即有心水清网民「Mokwan Chung」寸佢，「几时跟进下商场被破坏......都系（喺）元朗地头WO......袭警可以无事......」

　　一直煽暴的商台节目主持潘小涛，就转发一个post，内容系「至少超过百名便衣在新城市广场巡查。相信管理公司会努力配合警方」，佢叫「俾（畀）香港人过一个真正平安嘅平安夜，得唔得？」真系唔明佢系唔系唔理解乜叫「平安」，莫非到处纵火、堵路、搞破坏就系「平安」？

　　【华发网根据文汇报采编】