政情：工程项目大塞车 泛民拉布阻拨款 建造业促加会审批

Mary

　　

　　泛民主派不停拉布，已令好多工程拨款申请大塞车，接住又受反修例风波打击，依家再加上新冠肺炎肆虐，建造业嗌晒救命，业界生计大受影响，依家已积压咗六百一十亿元嘅工程项目申请，故要求立法会财务委员会加开特别会议，又呼吁议员放开政治议题，避免流会，尽快审批工务工程项目。

　　建造界大联盟发言人谢子华寻日去信畀立法会主席梁君彦，直指政府工务工程已连续数年大幅下跌，喺二○一八／一九年，全年只批出约五百亿元工程，比原先估计少咗一千二百亿元，而二○一九／二○年，政府预算推出约二千亿元嘅工程中，至今只批出唔够三百五十亿元，相差一千六百五十亿元。

　　严重影响工人生计

　　信中指出，依家喺财委会排紧队审批约有六百一十亿元拨款，呢笔拨款包括咗上个立法年度嘅四百亿元同今个立法年度嘅二百一十亿元。唔单止咁，喺工务小组委员会方面，二○二○／二一年度基本工程储备基金嘅整体拨款二百二十三亿五千万元亦受到阻延，令七十五项涉及逾一千亿元嘅新工程受到积压。

　　谢子华亦喺信中大吐苦水，话连续数年嘅工程量缺口，以及财委会同工务小组审议工程拨款嘅工作进展极度缓慢，令建造业界，特别系工程专业有关人员同工人生计造成严重影响，促请财委会加开特别会议，集中审批工务工程项目拨款，追回延误，同时希望所有议员喺抗疫嘅同时，亦暂时放下政治议题，尽职责出席会议，避免流会等事情发生，尽快审批工程拨款咁话。

　　陈健波插针狂加会

　　就因为工程拨款大塞车，工务小组委员会主席卢伟国同财委会主席陈健波，几乎有位就插针，不停咁加会，根本就系想快啲通过积压咗，尤其系同民生有关嘅工程项目，之但系工务小组委员会过咗嘅项目，排到上财委会都有排等。

　　其实陈健波都好头痕，事关佢加咗会希望可以疏导大塞车，点知班泛民主派议员喺公务员加薪嘅拨款申请拉布，经过多次会议都未表决。佢之后仲话要不断加班，之但系又遇上新冠肺炎袭港，受疫情影响更加要取消本周两节会议，而嚟紧下个礼拜嗰两节会议都未知开唔开得成，真系唔知点算好？

　　【华发网根据东方日报采编】