鸽党又民调 啱使先收货

Mary

　　

　　
　　传统「饭民」又要留喺议会，又怕冇民意支持，不惜肉酸地搵同一间机构反覆搞「民调」，希望创造「新局面」。揽炒派嘅香港民意研究所明明早几日先公布咗民调结果，无论电话定网上调查都显示超过六成「民主派」支持者反对议员延任，鸽党噚日又拉埋香港民研开记招，公布佢哋会搞多次民调，又话要教导市民留任优劣，等市民唔系净系识表态。鸽党虽然声称会服从结果，但就做埋「预告」，称若最终调查结果未达标，佢哋就会做「政治决定」。唔少网民就话佢哋系要做到「满意嘅民调」，揶揄佢哋输咗咪话三盘两胜，再输咪五盘三胜罗。
　　
　　香港民研近日公布嘅民调结果，大大力一巴巴咁打落传统「饭民」块面度，虽然鸽党林卓廷噚日喺记者会声称会尊重结果，但佢哋就冇打算正视个民意，所以咪再次委托同一间机构搞多次同一议题嘅调查，以寻找佢哋心中嘅「结论」。
　　
　　事件虽然引来社会疯狂耻笑，但鸽党照旧去马，噚日同香港民研见记者讲新一轮调查点做。鸽党主席胡志伟话初步了解个「双门槛」会剔除「无意见」嘅人，净低嘅受访者过半数有同一倾向，又或者净低嘅「民主派」支持者超过三分之二有同一倾向，就应该跟从决定。不过，佢亦「预告」如果最终调查结果未达标，佢哋就会做「政治决定」。
　　
　　称要教市民明白去留优劣
　　
　　林卓廷就话，除咗民调之外，佢哋会继续广泛讨论及辩论，话啲人「唔系话表过态就算！最重要系表态之前，大家明唔明白去留嘅优劣」，摆明寸上次民调班人未用脑。佢仲利用记者会机会，继续宣扬佢哋留喺议会嘅用途，叫「黄丝」「珍惜议会战线」，唔好弃守。
　　
　　「Terry的媒体懒人堂」噚日就喺facebook发帖谈论「民主与民主党的距离」，批评鸽党「何其傲慢，唔理民调，寸之前大家唔知头唔知路就投票。......有民调唔跟，又暗示之前民调结果，大家未清楚『去留嘅优劣』。仲要用『明日大屿』、『健康码』情绪绑架香港人？」版主仲话记者问及鸽党点反对到立法时，林卓廷就只系识讲佢哋会「拖」。
　　
　　今次咁肉酸，啲「黄丝」都一眼睇得穿传统「饭民」嘅手段。网民「Jonathan Lee」话佢哋「一日个结果未啱心水，一日市民都系不理性唔了解被误导。」「Jack Leung」就反驳佢哋︰「选民选你是用来代表民意，现在你却说你们比选民更有智慧，不一定要依选民的。」「Vincent Chan」直言︰「白鸽：大家明唔明白去留（对我哋）嘅优劣。」
　　
　　网民：要做个满意嘅民调
　　
　　「Hongkong Hong」就睇透︰「人哋要做到个佢哋满意嘅民调。」「Cheung Wai To Arto」揶揄：「合心意既（嘅）叫民调，唔合心意既（嘅）叫参考。」「YS Ki」觉得︰「成班咪又系惊无粮出，......根本唔系为市民。」「Hoi Fung So」耻笑佢哋︰「输咗咪话三盘两胜，再输咪五盘三胜......」「JJason Li」都费事烦：「求吓呇a（哋）留啦。好想睇佢地（哋）D（啲）食相。」
　　
　　【华发网根据文汇报采编】