民调唔啱心水 鸽党施拖字诀

Mary

　　

　　■ 民主党不断借所谓民调搞事。 资料图片

　　
　　口里说不，身体却很诚实。冇错，又系讲紧嗰班想延任立法会但又扭扭拧拧嘅传统「饭民」议员。事缘民主党两周前话会委托「专家」搞个决定去留嘅「结论性」民调，但迟迟都未有细节，当大家望穿秋水，以为佢哋噚日终于开记者会交代详情，点知最後都系得句「未倾好」。其实都唔怪得晒佢哋嘅，事关受佢哋委托嘅香港民意研究所，已经连续两次用类近题目嚟试水温，点知两次都有过半受访者反对佢哋延任，所以要多啲时间谂个「万全之策」都好正常，但按照呢个趋势，睇怕佢哋延任完一年都未必搞到个啱心水嘅民调嘞！
　　
　　民主党早前发晒邀请，话噚日会开记者会交代民调安排，点知姗姗来迟嘅佢哋，一嚟就话由于香港民研同有份合作嘅香港中文大学学者李立峯未处理好「技术细节」，所以冇进一步详情畀大家「知悉」喎，乜个民调要咁「技术」地做?咩？
　　
　　问题未答晒赶住走
　　
　　讲唔够5分钟，民主党林卓廷就提议完会，有记者即刻追问佢哋点睇之前香港民研嘅网上调查结果。林卓廷就话，嗰啲民调只系「参考性」，而下月21日搞嘅民调先系「结论性」喎。
　　
　　香港民研早前啲民调因为选项千奇百怪又可以全部剔晒而被人诟病，民主党主席胡志伟就声称，相信嚟紧嘅民调唔会有咁多选项，只会「围绕去或留」，但就戴晒头盔话要听埋其他「民主派」嘅意见先。
　　
　　问题未答晒已经赶住走嘅民主党，真系浪费咗香港民研副行政总监锺剑华嘅一片苦心，事关佢喺记者会前入嚟同记者讲，可能完会时撞正呢栋商厦6点放工嘅人潮，佢哋之前喺度搞记者会已经因为人太多被其他租户投诉，希望记者离开时可优先畀喺度返工嘅人搭升降机先喎。不过今次讲完都仲有大把时间，唔惊有人投诉啦。
　　
　　网民「Kingfai Chan」就嫌弃：「真系令人失望，记者会，完全冇内容，只系×噏几句。」「Chui Wah Lo」就话：「周身屎，仲咁多废话。」
　　
　　网民斥「成班垃圾」
　　
　　「Cheuk Hei Ho」就问：「想问下（吓）系咪民调要做到你地（哋）岩（啱）睇先得？」「Sino Lo」就回应：「延任是一定的。需要钱！钱！钱！」「Tlok Chiu」就火滚：「死心不息仲想留低，之前又话重点系9月重启选举，今次一句都冇提，成班垃圾！」
　　
　　民主党对议席欲拒还迎嘅态度，亦得失咗唔少旧有支持者，好似「Anthony Chung」就慨叹：「华叔（司徒华）走咗之後，民主党变晒，唔再支持，好心痛！」
　　
　　「Erica Yu」亦不满：「黄C（『黄丝』）民意唔听！为食血粮！留任永不再投！对民主派失望！」