【贵圈真乱】「光时」管理层涉亏空公款「走佬」

Mary

　　
　　传「黄店」薄待手足被罢买 「发起人」称炒高层博「黄丝」回心转意
　　
　　自称「良心」网购平台嘅「光时」，上月因传出管理层肥上瘦下嘅丑闻，结果成为「黄丝」罢买对象。眼见财路受阻，一名自称「光时」「发起人」嘅网民就喺「连登」开post，称一众股东曾要求相关管理层交代事件，点知对方已读不回，仲涉嫌亏空公款。呢位「发起人」仲话，唔排除炒咗嗰班有问题嘅管理层，希望大家可以喺「光时」重光嗰阵「继续支持」喎。讲嚟讲去，原来都系钱作怪。
　　
　　话说早前有人爆料，有位代号P、出任其中一个部门主管嘅「光时」义工，喺被旧公司炒鱿後要求「光时」开10万月薪请佢做全职，仲得到其他几个同流合污嘅部门主管支持。事後有自称「光时」旧员工嘅网民猛数「光时」几咁刻薄，点知「光时」喺facebook发声明，暗指有网民故意中伤佢哋，又拒绝回应所有「谣言」喎。
　　
　　与贵价物流合作冚住反对声音
　　
　　事隔一个月，呢位自称「光时」「发起人」嘅网民就以「『光时』最新发展及股东回应」为题喺「连登」开post，一嚟就卖惨话事件令公司生意大跌，而且主管P同K为咗冚住反对声音，竟然选择同间收费贵三成嘅物流公司合作，令佢慨叹：「种种情况已指证（证）现时管理层为保自己权力，做既（嘅）公司决策都只会加快『光时』灭亡，更加无可能（喺）未来再帮到更多『手足』。」
　　
　　私下设新公司疑转移资产
　　
　　「发起人」又话，P同K除咗已读不回，更私下成立咗间新公司，疑似想转移「光时」嘅资产，佢强调「光时」所有资产由股东持有，所以一有怀疑就会追究P同K亏空公款嘅刑事责任喎。
　　
　　讲到自己咁大权力，咁点解呢班股东当初仲开10万月薪请P呢？「发起人」就声称P同K攞晒控制权，所以佢哋已经被架空，对事件无能为力喎。
　　
　　不过，网民「juicybaby」就唔系好信：「你有权炒人但又冇权控制出几多粮畀佢哋？系咪出咗事冇钱赚，谂住一人分饰几角补镬？」
　　
　　「XO酱」都话：「肯定无晒生意先又整个回应出嚟啦」，「ididnt」就话：「其实唔想知，各位Unfollow（取消追踪）左（咗）未？去其他『黄店』买好过啦」，「明明三」亦揶揄：「『连登』唔系好多『黄』粉傻×死撑咩？又话分化又剩（盛） ， 原来口爽荷包立」，「irregular」就慨叹：「当呢单系『黄圈』负面教材啦」，「李李李」就心淡：「间间『黄店』都差唔多，啲人都咁渣。」
　　
　　【华发网根据文汇报采编】